Усяго ўдзел у спаборніцтвах прынялі 84 дзяўчыны, з якіх фіналісткамі сталі мацнейшыя 18, у тым ліку і лідар нашай каманды Марыя Гнедчык. Беларуска паказала другі вынік у фехтаванні, затым адкацілася ў сярэдзіну пратакола пасля не самых удалых балаў па выніках плавання і верхавой язды. На старт лазер-рана Гнедчык выходзіла з адставаннем ад лідара амаль у паўхвіліны, але бег са стральбой атрымаўся Марыі значна лепш за ўсіх саперніц. Фінішную рысу беларуска перасекла першай з запасам 8 секунд над карэянкай Сен Сенмін. Тройку прызёраў замкнула італьянка Алена Мікелі.

Гэта перамога на этапе Кубка свету стала для Гнедчык першай у кар’еры: раней у бягучым сезоне трохразовая чэмпіёнка II Гульняў краін СНД займала 17-е месца на этапе ў Каіры і была пятай на этапе ў Анкары. У Будапешце нашу жаночую каманду прадстаўляла і Анастасія Пракапенка, якая спынілася на стадыі паўфіналу, а таксама Вольга Сілкіна і Анастасія Малашэнака, якія завяршылі барацьбу на стадыі кваліфікацыі. У мужчын беларусам Максіму Маруку і Арцёму Еўсцігнееву прабіцца ў фінал не ўдалося.

Кубак свету па сучасным пяціборстве з’яўляецца адборачным турнірам на Алімпійскія гульні 2024 года. Усе ачкі, заробленыя спартсменамі на пяці этапах, пойдуць у сусветны рэйтынг, адкуль пуцёўкі ў Парыж атрымаюць па дзевяць найлепшых мужчын і жанчын, якія не заваявалі ліцэнзіі на папярэдніх стартах цыкла. Дзякуючы трыўмфу ў Венгрыі Марыя Гнедчык узнялася ў віртуальны топ-9, які прэтэндуе на паездку на галоўны старт чатырохгоддзя. Наступны этап Кубка свету пройдзе з 8 па 13 мая ў Балгарыі, а фінал розыгрышу адбудзецца ў канцы мая ў Турцыі.

Звязда, 27 красавіка 2024